Seigla


Seigla
8.-10. ágúst 2025

Seigla er kammertónlistarhátíð í Hörpu sem býður upp á fjölbreytta viðburði þar sem hið hefðbundna tónleikaform er brotið upp. Hátíðin fer fram árlega aðra helgina í ágúst.
Heildardagskrá þessa árs verður birt hér og á vefsíðu Hörpu síðar í júní.


Árið 2025 verður þema Seiglu frásögn. Við bjóðum hlustendum og flytjendum að túlka þemað á sem fjölbreyttastan og persónulegastan hátt og frá alls kyns sjónarhornum, hvort sem um ræðir hvernig tónleikaupplifunin sjálf getur skapað sameiginlega frásögn milli flytjenda og áhorfenda eða hvernig tónlistin ber sjálf með sér frásögn að einhverju leyti. Tónlistin, texti, rýmið eða samskipti gætu orðið hluti af stærri frásögn en hugmyndin getur bæði verið skýr og afmörkuð eða tilraunakennd og opin.


Á þessu ári býður Seigla upp á fjölbreytta dagskrá sem varpar ljósi á þemað frásögn. Hin ástsæla kammersveit Elja opnar hátíðina á föstudagskvöldi með Appalachian Spring eftir Copland ásamt verkum eftir Ruth Crawford Seeger, John Adams og fleirum, þar sem efnisskrá þeirra varpar ljósi á tónlist eftir hinsegin tónlistarfólk og tónlist sem varpar ljósi á upplifun hinseginleikans í Bandaríkjunum.


Á laugardaginn höldum við upp á Pride í Reykjavík, og hvetjum alla gesti Seiglu til að taka þátt í göngunni og öðrum viðburðum Pride, en að koma einnig í Hörpu á opna viðburði Seiglu á laugardagseftirmiðdegi. Um kvöldið verður flutt margbrotin einþáttungsópera Poulencs af söngkonunni Kristínu E. Mäntylä, sem verður ómögulegt að láta framhjá sér fara. Síðar um kvöldið kemur fram hópur frá London, Temporal Harmonies Inc, og flytur einstaklega spennandi tónleika sem bjóða áhorfendum upp á að skapa eigin tónlist í gegnum grafíska nótnaskrift sem verður flutt í síðari hluta tónleikanna.


Á sunnudaginn fara söngkonurnar Guja Sandholt og Bryndís Guðjónsdóttir með áhorfendur í leiðangur sem kannar tónlist eftir kventónskáld sem heyrist sjaldan hér á landi. Hátíðarhelginni lýkur með aldarafmæli okkar landsþekkta skálds Thors Vilhjálmssonar, þar sem fara meðal annars fram frumflutningar á nýjum verkum eftir Maríu Huld Markan og Hauk Tómasson sem samin eru við texta Thors og verða flutt af tónlistarhópnum Kima.


Hátíðardagskrá Seiglu í ár fer að miklu leyti fram í Norðurljósum,  en svo verða fjölskyldutónleikar Stundaróms í Hörpuhorni. Eins og í fyrra býður Seigla líka upp á tónleikaspjall með flytjendum í Yoko-horni, skemmtilega hátíðaropnun og að lokum er öllum gestum Seiglu boðið í lokahóf eftir helgina sem opið er öllum þar sem gefst tækifæri til að skála með og kynnast betur flytjendum og fólkinu bakvið hátíðina sem og hollvinum Seiglu.





Skipuleggjendur hátíðarinnar




Erna Vala
Þorgrímur
Þorsteinsson
Lee Marable
Erla Rut
Árnadóttir
Pétur Ernir
Svavarsson